Nagpahimangno ang Department of Health (DOH) sa Rehiyon 9 nga magbinantayon ning panahon sa ting-ulan ug likayan ang pagtaak sa baha tungod kay kini ang mahimong hinungdan nga nataptan ang usa ka tawo ug sakit nga leptospirosis.

Kini ang natuki atol sa gipahigayon nga media forum didto sa Mibang Hotel ning dakbayan sa Dipolog niadtong Hulyo 19 ning tuiga.

Sa datus nga gipresentar sa nasangpit nga buhatan, sugod sa bulan sa Enero hangtod Hunyo 29, 2018, nitala ug 62 ka kaso sa leptospirosis ang lalawigan sa Zamboanga del Norte diin ang lungsod sa Siocon ang nag-una sa listahan nga dunay reported suspected cases nga 52, gisundan sa Sirawai nga dunay tulo (3), Sibuco- duha, Baliguian- duha, dakbayan sa Dapitan- duha ug Sergio Osmeña- usa.

Sumala pa ni Mr. Rommel Jamolod sa Health Emergency Management Bureau (HEMB), kini tungod sa Severe Tropical Storm Vinta nga niresulta sa dakong baha sa Siocon ug Sirawai.

Hinungdan sa leptospirosis mao ang mikrobyong leptospira nga makuha gikan sa ihi o laway sa ilaga o mga hayop nga infected sa nasangpit nga mikrobyo nga mosulod sa lawas sa tawo pinaagi sa samad o open wounds, open pores sa panit sa tawo o kon malagsikan ang mata sa kontaminadong tubig.Kalagmitan kining makuha diha sa tubig-baha atol sa panahon sa ting-ulan.

Ang mga timailhan sa leptospirosis mao ang hilanat, takig, panakit sa batiis, tutonlan ug lutahan. Magpula ang mata, magdalag ang panit, lagum ang kolor sa ihi ug gamay ra ang ihi ug grabeng sakit sa ulo.

Kon ang biktima hilantan duha ka adlaw human ang baha, gikinahanglan nga magpa konsulta sa pikaduol nga tambalanan ug magpasagad ug painom ug tambal.

Aron malikayan kini, likayan nga motaak o maglangoy-langoy sa baha o hugaw nga tubig, mogamit ug bota kon gikinahanglang motaak sa baha. Patyon ang mga ilaga sa palibot ug imentinar ang kalimpiyo sa panimalay ug sa lokalidad.

Ang leptospirosis usa ka fatal nga sakit nga mo-apektar sa kidney ug atay ug kon dili maalibyohan, moresulta kini sa kamatayon. (PIC-elds)

Please follow and like us: