Lakip ang pagbendisyon sa Water Supply System sa Brgy. Kauswagan, Dapitan....
LAING TULO KA MGA PROYEKTO ANG GI-TURN OVER SA BRGY. DARO UG BRGY. KAUSWAGAN
Dapitan City, (Marso 9, 2019)--Duha ka road concreting, usa ka covered court ug ang pag inagurar sa bag-ong gitukod nga water system maoy gikahinangupan sa pag tambong sa mga katawhan sa duha ka barangay sa Daro ug kauswagan didto sa Dapitan nga nakaani og dakong kalipay tungod kay matud pa ni Konsehal Silvestre Verano, sukad pas panahon ni Governor Romulo Garrovillo (1955-1959), wala gayud silay natagamtam nga proyekto nga gikan sa provincial capitol.
“Walay makatupong pa sa kakugi ni Gob. Berto Uy kon proyekto ang atong hisgutan”, matud pa ni Verano.
Ang duha ka road concreting nga gikan utlanan sa Brgy Kauswagan, sa may karaang merkado paingon sa Brgy. Daro, nagkantidad kini sa Php3,370,000.00, ug lain pang road concreting sa mao gihapong barangay nga nagkantidad usab sa Php1,555,000.00 didto sa Brgy. Kauswagan.
Aduna usab gipahigayon nga pagbendisyon sa water system supply sa Brgy. Kauswagan nga nagkantidad sa PhP1,580,000.00, nga sa pagka karon pwede nang gamiton sa mga katawhan.
Sa susamang kalambuan usab, gi-turn over ang usa ka covered court sa Brgy. Daro, nga adunay gidak-on nga 20m x 30m lakip na ang pagsemento usab sa flooring niini nga nagbalor sa Php2,100,000.00 nga maoy nagsilbing lugar alang sa gipahigayon programa sa maong okasyon.
Diha sa mensahe ni Kapitana Diosdada Sangual, emosyonal kining mibutyag sa iyang mga tagibarangay nga “dili lamang kini duha ka proyekto nga gi turn over karon ang gihatag ni Gob. Berto Uy, kon dili aduna pa kini umaabot nga water system, school building ug barangay hall nga sa pagka karon aprobado na usab ang gipahat nga salapi niini.
Dugang pa sa kapitana nga “kon dili pa si Gob. Berto, dili kita makaangkon sa susama niining kadaghan nga proyekto nga bisan sa kadako sa atong probinsya ug sa kadaghan nga barangay nga mokabat sa 691 sulod sa 25 ka munisipyo ug 2 ka syudad, gihatagan pa gihapon kita ug mga proyekto.
Si Mayor Belen usab nga mitambong usab niadtong higayona, Pinpin Uy ug mga kauban, siya miingon nga “nalipay siya kaayo tungod kay lain na usab nga mga proyekto ang naangkon sa duha ka barangay”. Ug gani siya miingon nga “gikinahanglan kaayo ang tubig sa tanang barangay sa Dapitan tungod kay iyang naobserbahan sa dihang iyang gisuroy ang tanang barangay sa Dapitan, ang numero uno nga problema niini mao ang tubig kay nag salig lamang ang uban sa ulan aron maka salod, ilabina nga nagsingabot na karon ang el niño, dili niya ma-imagine kon unsa ka lisod ang matag pamilya kon walay tubig”.
Dugang pa niya nga “ ang tubig mao ang pinaka ‘basic needs’ sa tanang pamilya, diin kini nalantaw usab ni Gob. Berto Uy mao kamo nahatagan niini. Kinsa man diay ang mohatag kaninyo sa inyong gikinahanglan nga mga proyekto, di ba ang gobierno man? apan ang atong namunuan karon kamo gipasagdan lamang”.
Gipasupot usab ni Gob. Berto Uy, nga kon palaran gihapon nga mapili sya pag-usab isip gobernador sa ikatulong higayon, iyang himoon nga tourism center ang Dapitan, kay ang Dipolog usa naman kini ka commercial hub sa atong probinsya.
Butyag pa niya nga usa ra gayud ang paagi sa atong kalampusan sa atong probinsya kon kitang tanan magkahiusa, walay rason nga ang atong probinsya dili molambo.
Niini, si Gob. Berto ang nanawagan nga dili na magpalingla pa sa mga tawong huwad ug nagpaka aron ingnon nga kini mga maayo nga mga lideres. Kay kon kita mosipyat pa, dili gayud nato maangkon ang kadaugan ug ang atong mga paningkamot nga atong nasugdan, makawang lamang ang tanan nga atong gihaguan. ... See more
